Redaksi | Pedoman Media Siber | Disclamair | Kontak
Intermeso Sambing di Minggu Advent
ADVENT DI SANJOMPUT SASAGUN

PH Sitompul
Senin, 23 Des 2019 12:00 WIB | dilihat: 1450 kali

Albiner 'Rabar' Siagian

Nian, di minggu minggu Advent ma hita manganhon sasagun. I pe asa ampit jala umbuk. Hape, na masa jala na tahasomalhon ujui (ianggo nuaeng ndang apala dipatupa be sasagun), di bulan Januari, salpu taon baru, pe i tapangan. I pe dung suda pe kombang loyang dohot kue sihunti-rere.

Boasa ingkon di minggu minggu Advent panganon sasagun i? Alusna: asa hohom! Asa tudos tu unok ni Advent i hohom paimaima haroroNa. 

Aha hadomuan ni na mamangan sasagun tu na hohom? Uji hamu ma manganhon sasagun huhut manghatai, lumobi martata manang margahargak, ianggo so marsaburan sasagun i sian pamanganmu. Ingkon hohom do hita, huntam pamangantai, jala nanget hilhilon, asa unang marsaburan sasagun i sian pamanganta manang unang singgohan hita mamanganhonsa. Mamangansa pe, ingkon orihotik, sasanjomput.

Sasagun ima sada penganan tradisional Batak na dipatupa sian itak dohot harambir na dihurhur lamot. Dipauli ma i marhite na manggiang itak dohot harambir naung hinurhur i, dung i manaoksa sahat tu na rimpong hilhilon. Holan i do ramuanna. Molo tung pe ringkot tonggi sasagun i panganonta, sae ma holan mangambahon gula rihit di tingki na mamanganhonsa.

Hape, nuaeng on, unang pola di minggu minggu Advent, di Ari Pesta dohot Taon Baru pe nunga maol jumpang sasagun, lumobi ma di kota on. Na malo patupahon pe nunga maol jumpang. Angka roti sikkolat dohot kue kalapa nama dipatupa angka pararipesta di minggu Advent on. Na patupa kombang loyang pe songon i ma tong. "Ahh, suda tingki patupahon i. Tinggal tunjuk do nuaeng.", ninna na deba, rupani. Na nidokna, tinggal manuhor sajo! Hape, di napatupa angka kue Ari Pesta dohot Taon Baru i nian tupa parsaoran na sa keluarga dohot na marhombar jabu (isara ni na patupa dodol). Alai, i ma tingkina. Nunga tung ganggang nuaeng angka parsaoran nionjar ni hamajuon on.

Angka pandebisuk horong psikologi keluarga manosohon ringkot ni na parade tingki dohot inganan laho marsaor di angka pangisi ni keluarga/bagasta be. I ma nanidokna: "Shared-space for sharing understanding among family members." Alani, binsan sanga dope, beta patupa sasagun, kombang loyang, kue sihunti-rere dohot kue bawang. Asa adong sagihonnta tu angka dongan di Minggu Advent, Ari Pesta, dohot Taon Baru on. Alai, ianggo di Minggu Advent i, sasagun ma jolo tapangan asa hohom hita manomu haroro ni siboan dame dohot tua i.

Selamat Advent IV!

*)Kue sihunti-rere ima kue na menek na margula na pir (di tanggurungna) jala marragam keleurna. Somalna, markilo do i digadis di onan.



Rekomendasi untuk Anda


Connect With Us





Copyright © 2015 riaubangkit
All right reserved